Тәрәз төбендә яшеллек. Работа №74200

 «Тәрәз төбендә яшеллек»

(суган белән тәҗрибә үткәрү)

Эшләде: тәрбияче Аухадиева Айсылу Ильнуровна

Бурычлар:

1. Балаларда суган үстерү теләге тудыру, хезмәткә хөрмәт тәрбияләү.

2. Балаларда логик фикер йөртү күнекмәләре үстерү.

3. Суганның файдалы яшелчә икәне турында төшенчә бирү, суган үстерү турында белемнәрне тулыландыру.

Сүзлек:  Җылылык, яктылык, итләч, йомры.

Җиһазлар: туфрак, тартма, утырту өчен суганчалар, сулы лейка, тартмада һәм түтәлдә үскән суган рәсемнәре, бизәлеш өчен әкият геройлары сурәтләре.

Эшчәнлек барышы: 

1. Рәсемнәр карау ( түтәлдә һәм тартмада үскән суган рәсемнәре.)

- Бу рәсемнәргә карап, сез нәрсә әйтә аласыз?

- Яшелчәләрне түтәл ясап кайсы вакытта утырталар?

- Тартмада суган утыртуның нинди уңай ягы бар?

- Суган үссен өчен нәрсәләр кирәк? ( яктылык, җылылык, су )

2. “ Табышмак әйтәм – җавабын тап ”

А) Кечкенә генә йорт, эче тулы корт. (кыяр)

Б) Өсте яшел, асты кызыл, җирдә үсә. Ул нәрсә? (кишер)

В) Кат-кат тунлы, карыш буйлы. (кәбестә)

Г) Җир астында җиз бүкән, ул ни икән? (бәрәңге)

Д) Туп түгел – түгәрәк, тычкан түгел койрыклы. (чөгендер)

Е) Итләч, йомры, яшелен, өзеп алдым, яшердем.

    Гаҗәпләндем бераздан – кояшсыз да кызарган. (помидор)

Ж) Үскәндә яфрагын ашыйлар,

      Үсеп җиткәч, үзен ашыйлар. (суган)

3. Үстерешле диалог. (суган үзенчәлекләрен әйтү)

- Ул нинди формада?        

- Нинди төстә?

- Катымы, йомшакмы?     

 - Тәме нинди?  

- Суган ни өчен кирәк?   

- Суганнан нинди ризыклар пешереп була?

- Суганның файдасы нинди?

4. Суган утырту. Балалар белән бергәләп суган утырту. Суган утырту тәртибен сөйләмдә ныгыту.

5. Бизәлеш өчен әкият геройларын буяу, кисеп ябыштыру.

6. Сүзле – хәрәкәтле уен: “Аш пешерү”.

Ярдәм көтеп тормыйбыз,     

Яшелчәләр турыйбыз,

Чиста итеп юабыз,

Бераз кишер кырабыз,

Ваклап суган турыйбыз.

Тозлап майлап алабыз.

Яхшылап болгатабыз,

Бигрәк тәмле ашагыз.